Հոկտեմբերի 25-28 Տավուշի մարզի խոցելի համայնքների ներկայացուցիչների համար անցկացվեց «Կլիմայի փոփոխության ազդեցությունը սողանքների վրա և սողանքների կառավարումը համայնքներում» երկու վերապատրաստման դասընթաց: Միջոցառումը կազմակերպվել էր «Հարմարվողականության ազգային ծրագիր Հայաստանում» (ՀԱԾ) ՄԱԶԾ-ԿԿՀ ծրագրի շրջանակում՝ Տավուշի մարզպետարանի հետ համագործակցությամբ:

Դասընթացի նպատակն էր պարզաբանել կլիմայի փոփոխության կապը սողանքների առաջացման և դրանց վերաակտիվացման հետ, բարձրացնել բնակչության՝ կլիմայի փոփոխությամբ պայմանավորված բնական աղետներին դիմակայելու ունակությունը, տալ ընդհանուր տեղեկություններ սողանքավտանգ տեղամասերի արդյունավետ և անվտանգ օգտագործման, մշտադիտարկման մեթոդների կիրառման և սողանքային վտանգի մեղմման աշխատանքների վերաբերյալ՝ այսպիսով նպաստելով խոցելի համայնքների բնակչության՝ կլիմայի փոփոխության ռիսկերի նկատմամբ հարմարվողականության ներուժի բարձրացմանը և աղետների ռիսկերի նվազեցմանը: Դասընթացից բացի, ՀԱԾ ծրագրի շրջանակում նախատեսվում է մշակել ուղեցույց ուղղորդելու սողանքավտանգ բնակավայրերի բնակիչներին սողանքների մշտադիտարկման մեթոդների և գործելակերպերի կիրառման հարցում:

Դասընթացի մասնակիցները ծանոթացան Հայաստանում կլիմայի փոփոխության ռիսկերին, բացասական ազդեցություններին, խոցելի ոլորտներին, հարմարվողականության կարևորությանն ու հնարավորություններին: Ներկայացվեցին կլիմայի փոփոխության հետևանքով ՀՀ սողանքային իրավիճակը, վտանգները և ռիսկերը, մասնավորապես Տավուշի մարզում առկա և կանխատեսվող սողանքային վտանգները, սողանքների մշտադիտարկման պարզ մեթոդները նաև անօդաչու թռչող սարքերի գործածությունը: Հովք բնակավայր այցի շրջանակում մասնակիցները հնարավորություն ունեցան իրականացնել աողանքների ուսումնասիրության և քարտեզագրման, մշտադիտարկման սարքերի տեղադրման և չափումների, անօդաչու սարքով աշխատանքի և տվյալների հավաքագրման պրակտիկ աշխատանքներ: Դասընթացի ընթացքում քննարկվեցին նաև սողանքների մեղմման միջոցառումներն ու համայնքի ներգրավվածության գործելակերպերը:

Դասընթացներին մասնակցեց Սարիգյուղ, Գանձաքար, Հովք, Գետահովիտ, Աչաջուր, Վազաշեն, Թեղուտ, Գետահովիտ, Դիլիջան, Լճքածոր, Արճիս, Ներքին Ծաղկավան, Վերին Ծաղկավան, Նոյեմբերյան, Հաղարծին, Նավուր բնակավայրերի 21 ներկայացուցիչ:

Միջոցառման օրակարգ

Ներկայացված նյութեր